TWAZyèm Dimanch TAN LAVAN

Sèvis pawòl la: (Ane C)

““Pouse gwo rèl kontantman, Sovè a ap vin nan mitan nou!””

 

 

 

 

 

 

 

 

 

 

 

 

 

 

 

 

 

PREMYE LÈKTI

Lèkti liv pwofèt Sofoni   3, 14–18a

Pouse gwo rèl kè kontan, ou menm pitit fi Siyon! Chante ak kè kontan, ou menm Izrayèl! Fè kè nou kontan, fè fèt nan gwo kontantman, ou menm pitit fi Jerizalèm! Granmèt la retire kondanasyon ki te pandye sou ou a, li chase lènmi ou yo paske Wa Izrayèl la, Granmèt la la nan mitan nou. Ou pa bezwen fè kè sote paske pa gen okenn malè k ap tonbe sou ou ankò.

Jou sa yo, y ap di Jerizalèm: “Siyon, pa pè, pa dekouraje! Granmèt Bondye ou an nan mitan ou, li se yon vanyan sòlda, l ap gen anpil kè kontan poutèt ou menm, w ap vin pi jèn akoz renmen li genyen pou ou an, l ap fè fèt, l ap gen kè kontan poutèt ou menm." Tankou lè gen fèt, Granmèt la di: 'Mwen wete sa ki t ap fè nou pè a. Mwen wete wont ki te sou nou an'.

Pawòl Granmèt la.

 

SÒM REPONS   Izayi 12, 2–3, 4, 5–6

 

R/ Pouse gwo rèl kontantman, sila ki sen anpil nan Izrayèl la, li nan mitan nou!

1. Bondye se delivrans mwen, se poutèt sa mwen gen kè poze, mwen pa pè anyen. Fòs kouraj mwen se Granmèt la, li se sila ki delivre mwen an. Avèk kè kontan ou pral tire dlo nan sous delivrans la. R/

2. Di Granmèt la mèsi, fè lwanj pou non li. Se pou ou fè tout nasyon yo konnen mèvèy li fè yo, se pou ou rakonte jan non li gran. R/

3. Chante lwanj pou Granmèt la pou tout gwo mèvèy li fè yo, se pou tout tè konnen sa li fè yo. Se pou vil Siyon yo pouse gwo rèl kontantman paske sila a ki gran anpil la, sila ki Sen nan Izrayèl nan mitan ou. R/

 

DEZYÈM LÈKTI

Lèkti lèt apot Pòl ki sen pou Filipyen yo  4, 4–7

Frè ak sè mwen yo, se pou nou fè kè nou kontan tout tan. M ap di nou sa yon lòt fwa: fè kè nou kontan! Se pou tout moun wè jan nou gen bon jan. Granmèt la tou pre. Pa kite pwoblèm lavi a fè nou pèdi tèt nou, nan tout bagay, se pou nou lapriyè, fè Bondye konnen tout sa nou bezwen. Konsa kè poze Bondye a ki depase tout sa moun kapab konprann ap kenbe kè nou ak lespri nou nan JeziKri.

Pawòl Granmèt la!

 

Aklamasyon   Iz. 61, 1

 

Alelouya, alelouya. R/ Lespri Granmèt la poze sou mwen, li konsakre mwen, li voye mwen pote bòn nouvèl la pou sila yo ki pòv yo. Alelouya, alelouya. R/

 

LEVANJIL

Men Bòn Nouvèl JeziKri nan Levanjil ki sen an dapre Lik  3, 10–18

Lè sa foul moun yo di Janbatist: “Kisa nou dwe fè?” Li reponn, li di yo: “Se pou sila a ki gen de rad pataje ak sila a ki pa genyen an. Sila ki gen manje pou li manje dwe fè menm bagay la.”  Kolektè kontribisyon yo te vini pou fè li batize yo, yo di li: “Mèt, e nou menm kisa pou nou fè?” Li reponn yo, li di: “Sispann pran plis lajan sou moun yo pase sa lalwa mande.” Sòlda yo ki te la yo di li: “E nou menm kisa nou dwe fè?” Li reponn yo: “Pa fè vyolans sou pèsòn, pa bay fo temwanyaj sou moun, kontante nou ak sa yo peye nou.”

Tout pèp la t ap ret tann mesi a, yo t ap mande si se pa Jan ki Kris la. Jan reponn yo, li di yo: “Mwen batize nou nan dlo, men sila a ki pi gran pase mwen an gen pou vini. Mwen pa merite pou mwen defèt lasèt sapat li. Se li menm k ap batize nou nan Lespri sen an ak nan dife. Laye li nan men li pou li vannen – l ap netwaye galita li epi l ap mete ble yo, men kanta pou pay la, l ap jete li nan dife ki pap janm etenn nan.” Se ak anpil lòt pawòl ankò li t ap anseye foul la sou sa yo dwe fè, pandan li t ap preche bòn nouvèl la bay pèp la.

Annou fè lwanj ak konpliman pou pawòl Granmèt la!

 

== ==

 

PRIYÈ KOMINOTÈ

Dimanch 15 Desanm 2024

 (Ane C)

““Ann fè kè nou kontan, Granmèt la tou pre””

 

1- Pou legliz la

Nan lafwa, kè kontan, ak lapè, n ap tann bòn nouvèl la, Sovè nou pral vini. N ap lapriyè pou Pap François, pou Evèk yo, pou Pè yo ak Dyak yo, ann mande Bondye pou l bay kouraj pou yo ka kontinye rasanble pèp li a toupatou sou tè a, pou yo kab pataje bòn nouvèl sous delivrans la avèk yo.

Annou lapriyè.

 

2- Pou lidè yo

Sous delivrans la pral koule, Granmèt la nan mitan nou, pap gen sechrès nan kè nou ankò. N’ap lapriyè pou dirijan yo, pou tout moun ki gen responsablite politik, sosyal, ak ekonomik. Ann mande Bondye nan tan lavan sa, pou l mete lespri bonkonprann nan nan kè yo, konsa y a travay pou yo pote jistis ak lapè nan sosyete a.

Annou lapriyè

 

3- Pou Malad yo

Nou menm k ap soufri, pa pèdi lespwa, sila ki gen tout pouvwa a ap vin delivre nou. N ap lapriyè pou tout moun ki malad nan kominote nou an, pou tout moun kap soufri nan kè yo ak nan lespri yo. Ann mande Bondye pou l geri yo e bayo lafwa pou yo ka ret tann retou Kris la.

Annou lapriyè!

 

4- Pou Jèn yo

N ap lapriyè pou jèn nan kominote nou an, ak pou tout jèn k ap fè efò pou yo kenbe fèm malgre distraksyon sosyete a ap ofri yo. Ann mande Bondye pou l bayo yon lafwa ki djanm, konsa y a va kontinye prepare chemen Granmèt la kise sous lanmou, dyalòg, lapè, ak rekonsilyasyon.

Annou lapriyè.

 

5- Pou kominote nou an

Tan lavan se tan preparasyon, tan rekonsilyasyon, ak lanmou. N ap lapriyè pou kominote nou an, pou gwoup yo, ak layik angaje yo. Ann mande Bondye pou l chanje kè wòch nou yo, pou l bannou yon kè ki sansib, konsa n a gen konpasyon, lacharite youn pou lòt, e n a kapab viv kòm frè ak sè tout bon vre pou n fè yon sèl malgre diferans nou yo.

Annou lapriyè!